|
|
|
|
|
|
|
|
|
|
|
|
|
التاريخ
12/6/2009 11:23:41 PM
|
 حنفى الأبهه فى زفه أبهه
|
حنفى الأبهه فى زفه أبهه
فى البدايه قلت أيه الحكايه فى واحد سته يمكن النقابه تبقى سته على سته ونشوف السكه واحده ورايحه على الخير لكل واحد فينا ... لكن السكه طلعت مش مرصوفه ولازم عشان توصل تروح يمين وتيجى شمال وتنط لفوق وتنزل تحت وتطاطى كتير لحد ماتوصل وكم مساعد لك يمكن صحفى أو معد فى التليفزيون يخلى الفيزا حره وبدون عرض تطلع لفوق وتقول أنا أحسن من الأرجوز.. ولما الحكايه زادت عن الحد وبعد الى كان فى الفورسيزون .. كان لابد من التقسيم دى حتى فكرونا بتقسيم فلسطين لكنه أتنفذ فى شارع رمسيس وبقى لكل عضو مكتب عزوه وعزبه فى النكابه.ولأن الأتفاقيه الفورسيزونيه .. قالت بلاش شغل فى السياسه لحد مانورث الباشا ، فطلب الشهيدى ندوة عن إذدراء الأديان وبعد الموافقه وتحديد الميعاد كان الأمن مانع الأنعقاد وأصدر أوامره للخليفه بأخطار عدلى وأخوانه .. قلنا مش مشكله عشان الوحده تبقى دايمه فى حب مصر.. وبعد كده راح الساده المحامون وطلبوا محاكمه شعبيه -يعنى كده وكده – لمصدرى الغاز وبعد الموافقه والذى كان وترتيب الأوضاع ودعوة الساده الزوار وتحديد اليوم والساعه هرب الخليفه بتليفونه وبعت الأمن هناك وقفل البوابات ومنع دخول الزوار وكان وردانى متابع الأمر من جنب الحيط .. وبعد كده وفجأه طلع علينا خبر من صوت المحامين بيقول قاعة الحريات هدوموها وبلمس الأكتاف جبوها أرضا .وقالوا دى أحسن طريقه نمنع بيها الندوات والمؤتمرات ونريح الدماغ بعد ماكان أتصرف عليها الألاف من الجنيهات بمعرفة شيخنا عبدالسلام كشك وأسألوه هناك .
وبعد النكابه ماكانت نقابه ترتدى ثوب الحشمه زمان طلعت علينا لابسه سواريه وقدام الكاميرا دايما مستنيه وبالأضاءه متعريه لأن المراد نشوف صورته على الشاشه بضحكة حنفى الأبهه وهو فى زفه أبهه يدلى بأقوال فيها خفه بعقول متفتحه .
حتى فى كل هيصه تلقيه طلع على الزيطه وطلب أبومسلم يعد له برنامج يظهر فيه على الشاشه يعيد الحياه له ياساده .فبعد المباراه تخيل النظام أنه هيقطع العلاقات فطلب الكاميرات والصحافه معاها وقال هنعمل مؤتمر فى النكابه فى رمسيس وطلع عبدالحليم من التربه وقال صور يازمان .. صور يازمان .. خليفه بيحرق العلم هناك وتناقل الخبر وكالات الأنباء وبقت فضيحة النقابه فى كل مكان وتهديد بنقل المقر من
جاردن سيتى فى مصر ونشيل الرئاسه كمان ونخليها بالتناوب هنا وهناك فراح طالع علينا كالعاده ومعاه زفه بزياده وقال أنا كنت فى أسيوط مرتاح بمارس عملى هناك وبفتح نادى لأن ده إختصاصى بالتمام والكمال ومن ضمن الأختصاصات أدور على حتة أرض أفرح بها الجمعيه وأقولهم دى مدينة إسكان ، وراح يكذب الحكايه ولأن الكدب مالوش رجلين جت تصريحاته تحت الرجلين وقع البلد وخلاها بلدين ، ماأحنا شفنا حنفى الأبهه دايما يحب الزفه تكون أبهه . فراح على الجيزه وأصدر قرارات غريبه لكن الى كانو معاه عارفونه هناك فطلع المحرزى بجرأته وقال على الحكايه من البدايه للنهايه وطلع العيوب الى كانت مخفيه وورا الحيط منسيه وقال كلام كتير مضمون كما جاء بالإعلان
أولا : مخالفات مدينة المحامين ب6 أكتوبر :
1- لم يتم حتى الآن إلا بناء هياكل خرسانية لعدد 220 شقة من اجمالى 2400 شقة متعاقد عليها .
2- لم يتم حتى الآن ومنذ خمس سنوات تحديد أو تخصيص أو تعاقد على أى وحدة من وحداتها ولم يتم حتى استلامنا للمشروع تحديد القيمة النهائية لسعر الوحدة .
3- اكتشاف وجود ثلاثة أخوار بالمدينة تهدد استكمال المشروع وتكلفة معالجة هذه الأخوار حوالى 14 مليون جنية .
4- تجنيب عدد 400 وحدة سكنية لم يدفع لها أى مصروفات ومحجوزة بغير اسماء للحاجزين .
5- تم تشكيل لجنة مالية لمراجعة جميع تعاقدات شركات المقاولات مع النقابة الفرعية .
ثانيا : قيام النقيب السابق للجيزة بتحويل ودائع النقابة الفرعية للجيزة من بنك الدولة إلى بنك التمويل السعودى مقابل تعيين سيادته مستشارا قانونيا للبنك .
ثالثا : تبين لمجلس النقابة وجود مخالفات مالية مختلفة أهمها ما يتعلق بفوارق أسعار أجندة العام القضائى وكذا ما أنفق من تجهيز لمقر الشهر العقارى . بس ياريت الرساله توصل للساده الى جابوه وعلى الكرسى وحطوه . لأنه كان فى جره وطلع لبره وبعد ماكانت حدوده أبوالنمرس والعياط راح ألمانيا والمغرب كمان وبقى زبون دايم على الفضائيات .. ومعاه نسى تكوين ميزانية المليار وخد معها كام مليون كانت متعانه لوقت الزنقه نجيب منها قرش أو قرشين للمريض والأيتام . لكن نقول أيه ماهو طلع بتاع كلام وغاوى إسكان على الفاضى حتى فكرنى بأغنية أفرش منديلك على الرمله وأنا ألف وأجيلك على الرمله .وحتى الآن بالمخدر شغال وعلى المحامين محتال بالأفتتاحات بكام طوبه وقصعة مونه ومعاهم مسطرين ماسكه بأيده ورافع الطوبه وبيسطر وهم جديد والكاميرا بتصور وتنقل الصوره . وأضحك الصوره تتطلع حلوه .. حتى طلع علينا هريدى كمان وقال أنه غير مقتنع بهذا الكلام .. لكنه قرار مجلس ياسلام .. ولأنه غاوى إضاءه وتصوير طلع علينا خبر بيقول هيجيب أمين السياسات يفتتح قاعة الحريات بعد الخراب الذى كان . حتى الياس بعد اليأس من الوطنيات طلع علينا بخبر كان ينظم فيه مؤتمر يشجب فيه منع المأذن فى سويسرا هناك وشوف التكلفه كام . ياعم روح دور على القدس هناك الى عايزين يهوديها ويمحوها من الوجود هناك وأعمل مؤتمر نشوف الحل معاه تبقى فلسطينيه ولاحاجه تانيه يبقى لنا كلام تانى .. ولا روح ودور على المشاكل إلى بتقابلنا فى كل حته مع القاضى والقاصى والشرطه وتجيب الكرامه معاها مش تروح تقدم إعتذارات وياريت بدل الأبهه والهيصه والزيطه تخلى النكابه نقابه وتغير المنظومه وتبعدها عن الحزن الوطنى وخلافه وخبى الكاميرا شويه وأبعد عن الحياه بالضحكه الغاليه والكلام فى الفاضى كمان وأبعد عن الهيصه لأنك بقيت تطلع لنا فى الأحلام من كتر مابنشوفك فى الفضائيات وخليت النقابه لبانه يمضغها الى رايح والى جاى وربنا يقدرنا ونتحمل الى جاى ياأبهه ياأبوزفه أبهه
 
الأخ/ علاء
أشكرك لك فطانتكم ودماثة خلقك وحيث أننا نقدر شخصكم الكريم ، مما ينبغي أن أعاتبكم فيما ورد بموضوعكم متهكماً على النقيب ، سيدي وزميلي المحترم، للزمالة حق وحق علينا نحن كمحامين أصحاب كلمة الحق ومدافعين عنها أن نتبع الحق ولا تثريب على الناقد إلا أن يكون موضوعاً خارج عن السخرية والإستهزاء .
.
والسلام عليكم ،،،
ياسر الغندور
|
|
|
|
|
|
|
|
|
|
|
|
|
|