منتدي المحامين العرب المنتدى العام مجاهد عبد العال مجاهد ((ثمن الغربة))
مجاهد عبدالعال مجاهد شاب بسيط من الأرياف كان له حلم بسيط على قده نفسه يلاقي قوت من كده نفسه يلاقي ثمرة تعبه أكبر حلمه وظيفه حكومية المهم تكون له مهية ماحلمش يكون في إدارة لاوزارة ولا في سفارة ولا حتى في الاتصالات على قده الحلم بسيط بس يا ميت ألف خسارة لاهو من أبناء عاملين ولا واسطة والحالة ضيم مسكين ده أبوه فلاح ولايعرف غير الأرض وجاموسة بتعزق غيط ولا عنده لامال ولا صيت وكعابه دابت م اللف ع البوتيكات عمال يلف عشان جنيهات واللي يلاقيه مش قد القول واهي شغلانه.. على قد العيشة.. على قد طبق الفول!! ... وفي يوم من الأيام صاحبه قال له يامجاهد.. أرض الله عمار تعالى نشوف شغلانه.. في الغردقة أو شرم الشيخ انشاالله في بلاد زنجبار والأرزاق على الستار هم الهمة وقال يافكيك أهي شغلانه والسلام ولاحدش عارف الخير فين نبحث عنه ولو في الصين ... وراح مجاهد ويا صاحبه واشتغل في فندق كبير شويه موظف في الأمن وشويه كاشير واهي مرت بيه الأيام.. وزادت وياه أحلام واتعرف على تركمانية وقال اتجوزها واسافر وهناك ابقى آخد الجنسية بس ياحسرة الفرحة ماتمت أخدها الغراب وطار قضت معاه يومين وهجت وكانت صدمة كبيرة عليه بس صاحبنا لساه مصمم انه يسافر في يوم أوروبا بلد اليورو والعملة الصعبة لاطابور عيش ولاعزق وحرت ولافيش فرق ولانسوان عايزة الحرق كله ملون في ملون أصفر في أحمر أزرق في أخضر عيشة تزنهر واد يامجاهد شد رحالك روح شوف حالك يمكن برة تكون أحلامك يمكن بكره يكون لك خير يمكن يومها يعود الطير شايل أحلامه.. ... هج مجاهد ركب الموج هربان في سفينة فوج ويا زمايله شد رحايله وقال يافكيك أيام في البحر شقا وغلب يمسح.. يغسل قهر وغصب واللي ماعاجبه يرجع عوم ويوم ورا يوم لحد ما يوم شاف الشط هب ونط والقبطان انشال وانحط اوعاك فاكر تيجي معانا اللي معانا معاه تصريح وانت يادوب حتة سريح عايز الدنيا علينا تقوم ياللا ياشاطر كمل عوم نط مجاهد ويا زمايله قبل المرسى بيوم وكمل عوم وسط الموج ويا زمايله وموج ورا موج مات مرسى.. ومات عبد الواحد.. واحد وراه واحد.. لحد مافضل منهم واحد إلا مجاهد ظل يجاهد لأجل الموج مايطوله صريع لأجل يكمل حلم زمايله فضل شايله.. ووصل الحلم لبر أمان وصل معاه مجاهد.. ومرت أيام وأيام ومرت سنين وسنين وكبر مجاهد وكبرت تجاعيده وكل خط على جبينه راسم ماضيه وجديده صاروا يقولوا عليه فرعون وبيطلع في التلافزيون أصل مجاهد كان واد شاطر راح يفلح فين مايكون وقال مجاهد حققت حلمي ونفسي أرجع مصر بلدي بعد سنين الغربة الصعبة واحشاني اللمة والصحبة واحشاني قوي يامصر ورجع مجاهد راجع طاير مش بيعـوم ركب الجو عشان مايعوم ولا ساعتها يقولوا نطير لأ ياخواننا المره دي معايا تصريح أركب ريح وأرجع مصر بشكل مريح ووصل مجاهد لأرضه وطاطى يبوس أرضه وقام صايح وقال رايح على داري أطفي شوقي واطفي ناري نفسي آخد أمي في حضني وابوس يد أبوي وفي الطريق قابل عمه عم أمين؟!! ياااه.. مجاهد!! لساك بخير ياولدي!! عم أمين!! أمال فين أبوي وأمي؟!! آه ياولدي!! أمك ماتت في طابور عيش!! وأبوك مات في طابور بنزين!! عم أمين!! آآآه يامصيبتي!! هو لساه فيه طوابير!! أيوه ياولدي.. لساه فيه شقا لساه فيه غلب حاجات كتير ما ع تنتهيش والناس نفسها تاكل عيش بس اللقمة ما ع تكفيش راحت منيها البركة ياولدي وانت البركة فيك آآآآآه يابلدي!! ياللا ياولدي.. ع الدار عندي الدار شرحة وبرحة وبنت عمك فرحة طارحة علينا الفرحة لساها واخده الدكتوراه ياه.. ما شاء الله!! بكره ياولدي نفرح بيك.. وبنت عمك أولى بيك.. عمك خلاص حسن الختام ونفسه يفرح بيها وبيك ياااه يامجاهد قادت الأنوار واتزين الدوار والليل صبح نهار مجاهد اتجوز فرحة زغاريد في كل مكان غطت على الأحزان والفرحة تمت والناس اتلمت وباركت وهنت ... ومجاهد لسه الخير جواه نفسه يزور بيت الله شكر ربه على النعمة والفضل والدوام لله راح مجاهد ويا فرحة ركب العبارة عبارة السلام رايحة لبلاد الإسلام بلد نور والإيمان بلد الخير في كل مكان وركب مجاهد الموج والمرة دي معاه تصريح يركب موج ويا الفرحة ويا الفوج رايح تايب لاجل يروق ركب الموج ويوم ورا يوم لحد ما يوم شاف الشط هب ونط لكن الموج انشال وانحط ويا عواصف برق ورعد جزر ومد وكأن الأيام تتعد نفس المشهد ويا زمايله لساه شايله مرسي وعبدالواحد وكل واحد كان الحلم شايله وفرحة.. انتي فين يا فرحة رحتي فين يافرحة!! ناس بتصرخ في كل مكان العبارة أي كلام في بلدنا قالوا كل شيء تمام واهي كلها أيام.. بص مجاهد وسط الموج شاف الفرحة شايله في يد الطرحة وفي اليد التانية كفن ويا فرحة ماتمت أخدها منه الزمن وكأن الفرحة هي الثمن ثمن الشقا والغربة بره بلاد الشجن ... طب مين يقول حلال ده ولا حرام ومين يحاسب مين ع الغربة والأحلام وع الفرحة آآآآه يافرحة.. نط مجاهد لاجل يطول الحلم بيده لكن الحلم المره دي فلت من يده وكان مصيره ساب الطرحة ومسك في الكفن بيده مجاهد!! آآآآه يا مجاهد!! ... ليه يا موج؟!! ليه ياموج البحر واخدنا ببلاش؟!! ولا مش فارق معاك مين انكوى بالنار ومين ماانكواش لا اللي ركب ع الموج سليم نجي م الموت ولا الغرقان وكان هربان نجي منك وعاش.. ياموج البحر!! ... طب مين نحاسب البحر؟!! ولا اللي كانوا مهملين؟!! مش مهم شالوا مين!! مش مهم قتلوا مين؟!! مش مهم الفرحة تكمل بالدمع الحزين!! مش مهم الحلم يكمل للناس الطيبين!! الأهم بكام وفين؟!! والقضاء حالف يمين بس مين يفهمه؟!! البراءة ليها ناس والقانون أصبح مداس واللي مات مننا الله يرحمة!! ***
الانتقال السريع اختــــار ------ منتـــدي المنتدى العام ------ ------ منتـــدي من أعلام القضـاة والمحـامين العرب ------ ------ منتـــدي استراحة المنتدى . ------ ------ منتـــدي منتدى الاستشارات القانونية ------ ------ مكتبـــة الأبحاث القانونية------ ------ مكتبـــة القوانين العربية------ ------ المكتبـــة الصوتية------