لو مصر مش عاجباكم سيبوها لنا
لو شايف اننا شعب مايجيش غير بالكرباج
شوف يا شوكت باشا اغا يا اللى عايش فى دور البرنس...كونك بتفك الخط بالانجليزى مايخليش جنابك انضف من الشعب والسبب انك ماسبتش البلد ان بلاد برة مش عايزاك او انك هتكتشف ان مؤهلاتك الرهيبة فى اوروبا وامريكا هتخليك مواطن عادى جداً....ولو مش عاجباك امشى احنا مانستاهلكش
لو شايف انك عبقرى والشعب عبارة عن فلاحين جهلة
شوف يا جهبذ ...الامريكان اجهل شعب الارض برضه بس مابيعايروش بعض وكونك قريت لك كتابين بالصدفة خلوك تهلفط بكلمتين وانت بتشيش مع صحابك مايخليكش ابدا مثقف..لان المثقف هو القادر على تكوين رأى..وعباس العقاد لو تعرفه كان معاه الابتدائية وطه حسين لو سمعت عنه كان فلاح واللى اخترع طرق الرى اللى اتعلم منها شعوب الارض كانوا فلاحين مصريين لا بيعرفوا يقروا ولا يكتبوا...عارف كلمتين زيادة انفع بيهم غيرك او انفع نفسك الاول وماتنساش يا جهبذ انك كنت قبل الثورة اخرك تتكلم عن ابوتريكة فماتجيش تطبق فكرك على سياسة البلد..الفلاحين دول هم مصر..مش عاجبيناك امشى وروح اغسل صحون فى اوروبا
وصدقينى يا هانم لما حضرتك وانتى شايلة الشنطة الويى فيتون وبتتكلمى عن
desperate house wives
انتى نسخة شبه اجنبية من الست ام الخير وهى شايلة مشنة العيش وبتتكلم عن مسلسل نرمين الفقى..
صدقينى يا هانم هى هى..
على الاقل هى مصرية وانتى بتحاولى متبقيش كدة..يعنى هى الاصل وانتى لا خواجاية ولامصرية
لو شايف ان المسلمين ضيوف دمهم تقيل
والله لو حضرتك شايف كدة يبقى انت كدة افترضت ان المسيحيين هنود حمر ومحتاجين محمية دولية يعيشوا فيها ودة كلام فارغ لانك افترضت ان الاسلام احتلال عمل حرب ابادة شاملة عرقية دينية للشعب المصرى اللى كان بيدين معظمه بالمسيحية وعمرو بن العاص جاب معاه شعب جديد مكانه مسلم..وحرب الابادة دى سابت الكنايس والمعابد المصرية واليونانية والرومانية زى ما هى ودة غريب على احتلال مفترض انه جاى يغير هوية بلد...
ولو رحت المتحف القبطى هتلاقى فى الاول الاناجيل كانت باللغة القبطية المصرية اللى هى مزيج من اليونانية والمصرية القدديمة بحروف يونانى وبعدين بقت بلغيتين القبطية والعربية معا ثم العربية وذلك حدث فى مدة طويلة للغاية تنفى فكرة طمس الهوية المصرية المسيحية.
والا اعتبرنا ان المسيحية طمست الديانة المصرية القديمة واستخدمت معابدها والحان ترانيمها. واذا كان الاسلام قد اتى من بلاد العرب فالمسيحية اتت من فلسطين.
واالضيوف دول اتقتلوا علشان خاطر مصر من اول التتار للفرنسيين للانجليز والاسرائيليين.
فيه ضيوف تقال يعملوا كدة برضه؟
...وبعدين امن الدولة حضرتك كان بيقفش فى الضيوف دول ويعذبهم بعد ما كان بيولع فى كنيسة القديسيين.
ولو عايز حماية دولية من امريكا كان الامريكان قدروا يحموا المسيحين العراقين اللى الكيان الشبحى اللى اسمه القاعدة قتلهم وكان الاحتلال الانجليزى اداك امتيازات كونك مسيحى. وياترى ليه التلاميذ المسلمين فى المدارس الكاثوليكية ماحدش فيهم فكر يولع فى كنيسته؟ وليه مافيش حد اتهجم على كنيسة فى منطقة اغلبية سكانها من الطبقات الراقية او المتوسطة؟....علشان الموضوع تعليم وثقافة مش ديانة..الجهلة المسيحيين فى اوروبا هم اللى رفضوا فكرة جاليليو ان الارض كروية وتدور حول الشمس..يعنى لا البلد ولا الديانة..التعليم
لو شايف ان كتر خيرنا اننا سايبين المسيحيين فى مصر
وحضرتك يا علامة افقه من كل المسلمين من ايام عمر بن الخطاب حتى اليوم وائمة المسلمين منذ فجر الاسلام حتى عصر الشيوخ الفضائيين علشان تقول الكلام الفارغ دة؟
لو انت اخوانى..مافيش حد مشى فى جنازة حسن البنا غير مسيحى ولو انت سلفى ..السلف ماهادوش ولا ولعوا فى كنيسة...ولو انت مجرد واحد مربى دقنه وعامل فيها سلفى وفاكر ان السلفية دقن وسواك..ارجوك انت بتضر الاسلام والمسلمين..اقرا الاول وافهم معنى السلفية وروح لشيوخ بجد فاهمين مش لواحد جاهل وتحط جهلك على جهله وتضر نفسك والبلد والمتدينين اللى بجد.. السلفيين كما اعرفهم ناس مسالمة لكن بفضل امثالك من الجهلة شوهت السلفية وخليتهم رمز للكراهية علشان جهادك الاليكترونى ..اتقى الله..خليت السلفيين عمالين يدافعوا عن نفسهم عمال على بطال تفرق انت ايه عن الجهلة فى اوروبا اللى منعوا النقاب والقسيس الامريكى الارهابى اللى حرق المصحف وتفرق ايه عن الرسام الدانمركى بتاع الرسوم المسيئة؟
ولا حاجة..انت زيهم ولو كنت مكانهم كنت عملت كدة لانك مدفوع بالكراهية..الفرق انك اتولدت مسلم بس.
لو شابف ان الثوار دول رعاع ومبارك دة كبيرنا
الرعاع دول شالوا الكبير بتاعك...بس لسة عندك امل... اقف فى ميدان التحرير زيهم فى البرد ووسط الطوب والرصاص والبلطجية ولو عندك نص الشجاعة اللى عندهم هنحقق حلم حياتك ونبعتك طرة
انا عارف انت بتعانى من ايه وقلبى عندك..انكل اللى كان بيجيب لك الرخص فى السجن...والباشا اللى كان واسطتك اترفد والناس بتتكلم فى كلام مانتاش فاهمه..الكلام عن السفارى اللى انت عملته وكاميرتك الجديدة مابقاش يبهر زمايلك فى الشغل او البنت الجديدة اللى بترسم عليها لانهم بيتكلموا فى حاجات صعبة على دماغك اللى انضف من قيشانى حمام لسة مدعوك
ولو شايف انك مصرى وفخور بكدة احب اقول لك..دى بلدنا احنا..سواء كنا سلفيين اخوان شيوعين ارثوذكس كاثوليك بروتستانت يهود ملحدين لادينيين ليبراليين اشتراكيين شيوعيين فلاحين افندية نوبيين صعايدة بدو صيادين مثقفين او مش متعلمين...دى بلدنا احنا وهم اللى ضيوف ودمهم تقيل.
منقول ..............
محمد عبدالرحيم
